காணவில்லையே!


காணவில்லையே!
இதற்கு முன்பெல்லாம் ஆலயத்தில் அடிக்கடி உங்களைப் பார்க்க முடிந்தது. இப்போது எங்கே காணவில்லையே! ஏன்?

          எஸ். காஞ்சனா, மைலாப்பூர்.

         இதற்கு முன்பெல்லாம் பெரும்பாலும் தனிமையில் இருப்பதை விரும்புவேன். இப்போது  அதை சிறிது மாற்றிக்கொண்டிருக்கிறேன். பெரும்பாலும் சீரடிக்குப் போகும் நாட்கள் தவிர மற்ற நாட்களில் காலையிலோ மாலையிலோ கண்டிப்பாக பெருங்களத்தூர் ஆலயத்தில் இருப்பதை வழக்கமாகத்தான் வைத்திருக்கிறேன்.

         சில நேரங்களில் சாயி பக்தர்கள் என்னைப் பார்க்க வேண்டும் என்றும் அதற்காகவே வந்ததாகவும் சொல்லிக் கூப்பிடும்போது அவர்களைத் தவிர்த்து விடுகிறேன். காரணம், பாபா அற்புதமான கடவுள். அவரைப் பார்த்து மனமுருக வேண்டுதலே போதும்.

         உதாரணமாக, காகாஜி என்ற சப்தஷ்ரிங்கி கோயில் பூசாரி பாபாவை தரிசிக்க வந்தார். அதற்கு முன்புவரை அவரது மனம் ஏதோ குழப்பத்திலேயே இருந்தது. பாபாவைப் பார்த்தார். பாபா பேசவில்லை, ஆசிர்வதிக்கவில்லை, வெறும் தரிசனம் ஒன்றே அவரை அமைதிப்படுத்தி, மகிழ்ச்சிக்கு அடிகோலியது. இது சத் சரித்திரத்தில் பதிவாகியுள்ளது. இதுதான் சாயி தரிசனத்தின் பெருமை. இதை உணராமல் சாயி வரதராஜனைப் பார்த்தால் என்ன ஆகப்போகிறது?

         என்னைப் பார்க்க உண்மையிலேயே என் மீது பக்தியோடும், நம்பிக்கையோடும் வருகிற சாயி கலியன், அனந்த ராமன், ரமா போன்ற ஒரு சில தூய பக்தர்களின் பிரச்சனைகள் இன்னும் தீராமல் அப்படியேத்தானே கிடக்கின்றன. எனக்குச் ச்க்தியிருந்தால் அவர்கள் துயரத்தினை ஒரு நொடியில் களைந்திருக்கமாட்டேனா?

        நானே அவனது பாதங்களைப் பிடித்துக் கொண்டு உட்கார்ந்திருக்கிறேன்.  நீங்களும் வந்து பிடித்துக்கொள்ளுங்கள் என்று வழிகாட்டினால், அவனது பாதத்தினைப் பிடிக்காமல் என்னைத் தேடுவது ஏன் தாயே!   

                                                      சாயி வரதராஜன்

ஸ்ரீ சாயி தரிசனம் செப்டம்பர் 2012 இதழில்

வெளிவந்த கேள்வி பதிலில் இருந்து
Advertisements

தொடர் கஷ்டம் ஏன்?


தொடர் கஷ்டம் ஏன்?
நான் என் நண்பனுக்கு சாயியைப் பற்றிக்கொள்.  அவர் உன்னை கஷ்டங்களில் இருந்து விடுவிப்பார் என்று சொன்னாலும் கேட்கமாட்டேன் என்கிறான். எப்படி கேட்க வைப்பது?

          கே.ராஜா, செங்கல்பட்டு

              பாபா கேட்கவைக்காதபோது நம்மால் முடியாது. இறக்கும் தருவாயில் இருப்பவன் மருந்து சாப்பிட மறுப்பான். அதுபோலத்தான் கஷ்டத்திலிருந்து விடுபடும் வாய்ப்பு இல்லாதவன் நன்மை பயக்கும் சாயி நாமத்தினை அலட்சியம் செய்வான்.    

                                                      சாயி வரதராஜன்

ஸ்ரீ சாயி தரிசனம் செப்டம்பர் 2012 இதழில்

வெளிவந்த கேள்வி பதிலில் இருந்து

வியாழக்கிழமை விரதம்


வியாழக்கிழமை விரதம்
வியாழக்கிழமை தோறும் விரதம் இருக்கும் சாயி பக்தர்கள் பெருங்களத்தூர் பிரார்த்தனை மையத்தில் விரத பூஜைகள் அனுசரிக்க ஏற்பாடுகள் செய்யப்பட்டுள்ளன.

வீட்டில் விரதம் இருக்க முடியாதவர்கள் தொடர்ந்து ஒன்பது வாரங்கள் இந்த பூஜையினை மையத்தில் செய்து கொள்ளலாம். அன்னதானத்தினை இங்கேயே விநியோகமும் செய்யலாம். விரதமிருக்க விரும்பும் தாய்மார்கள், நமது பிரார்த்தனை மையத்தினை அணுகலாம்.

விபரங்களுக்கு:

ஸ்ரீ சீரடி சாயி பாபா பிரார்த்தனை மையம்

கல்கி தெரு, புதுபெருங்களத்தூர்

சென்னை 600 063.

அலைபேசி எண்

9094033288

9841203311

நீ பூரணமாக இரு


நீ பூரணமாக இரு!
     அமைதியான மனத்துடன் இருங்கள். உங்கள் கஷ்டங்கள் இன்றுடன் முடிவுக்கு வந்துவிட்டன. படைக்கும் தெய்வமாகிய பிரம்மாவிலிருந்து புல் பூண்டு வரை இப்பிரபஞ்சத்தில் எங்கும் நிலவி இருக்கும் அளவற்றதும் முடிவற்றதும் பூரணமானதுமான முழு முதற் பொருளே பாபாவாக உரு எடுத்து நம்மிடம் வந்துள்ளது. இதுவரைக்கும் கஷ்டம் முடிவுக்கு வராத நிலை தொடருமானால் உங்கள் நிலையை சரிபார்த்துக்கொள்ளுங்கள். அதாவது நீங்கள் இதுவரை பூரணப்படவில்லை என்பது பொருள். பூரணமாக என்ன செய்யவேண்டும்?

       உங்களிடம் என்னவெல்லாம் தேவையில்லாமல் இருக்கிறதோ அதையெல்லாம் வெட்டவேண்டும். பணப்பெருமை, குலப்பெருமை, ஜாதிப்பெருமை, கல்விச்செருக்கு, பக்திச்செருக்கு என எதுவாக இருந்தாலும் அவற்றை உடனடியாக விட்டுவிட வேண்டும். இவை உங்களுக்கு நன்மை தருவதுபோல தெரியலாம். பிறருக்கு நன்மை தராது. ஆகவே உங்கள் நலனுக்குத் தீங்காகவே இருக்கும்.

       அதேபோல, வறுமை, ஏழ்மை, தாழ்வு மனப்பான்மை, குலத் தாழ்ச்சியாக நினைத்தல், பிறரை விட வசதி குறைவு என எண்ணுதல் போன்றவையும் பாவங்களாகும். இவற்றையும் மனதிலிருந்து எடுத்து அப்புறம் போடவேண்டும். இவற்றால் உங்களுக்கு எந்த நன்மையும் தீமையும் கிடையாது.

       வாழ்க்கை வாழ்வதற்காகத் தரப்பட்டுள்ளது. நீங்கள் வாழ்வது போலவே பிறர் வாழவும் நினைத்தால் உங்கள் துன்பங்கள் முற்றுப் பெற்றுவிடும்.

       நான் இப்படி எழுதக் காரணம் என்னவென்று எனக்குத் தெரியாது. என்னைக் கருவியாகக் கொண்டு சாயியே இவற்றை எழுதி வாங்குகிறார்.  அவருக்குத்தான் இதன் பிரயோசனம் என்னவெனத் தெரியும். எந்த சக்தி என்னை எழுதத் தூண்டுகிறதோ அந்த சாயி சக்தி உங்களைக் காப்பாற்றும். இதில் துளியளவும் சந்தேகமில்லை.

       குரு பக்தியின் மகிமையையும், வேறு எதையும் நாடாமல் சாயி பாதத்தைப் பிடித்துக் கொள்வதின் நன்மையையும் அனுபவித்து உணர்ந்து கொள்ளுங்கள்.

       வாழ்க்கையின் சிறப்பு எங்கே இருக்கிறது (சாயியின் பாதங்களில்) என்பதை முதலாவது நிச்சயப்படுத்திக்கொள்ளுங்கள். அப்போதுதான் தடைகளை வெல்ல முடியும். தடைகள் என்பவை நம்மை தொலைத்துவிடும் தொல்லைகள் அல்ல. நம்மை முன்னேற்றிச்செல்லத் தூண்டுபவை. எனவே நம்மோடு இருக்கும் சாயியின் துணை கொண்டு முன்னேறிச் செல்லுங்கள்.

       நம் சாயி பூரணமானவர். அவர் படைத்த உலகம் பூரணமானது. அவரது அருளும் பூரணமானது. அவரது படைப்புகளான நாமும் பூரணமாக இருக்கவேண்டும். அதற்கு ஒரே வழி அவர் மேல் அசைக்க முடியாத நம்பிக்கை வைப்பது.
ஓம் பூர்ணமத: பூர்ணமிதம் பூர்ணாத் பூர்ணமுதச்யதே!

பூர்ணஸ்ய பூர்ணமாதய பூர்ணமேவாவசிஷ்யதே!
                                       சாயி வரதராஜன்
ஸ்ரீ சாயி தரிசனம் நவம்பர் 2012 இதழில்
வெளிவந்த கட்டுரை